Sunday, May 28th, 2017

வவுனியாவிலும் காணாமல் போகச்செய்யப்பட்டோருக்கு மரணச் சான்றிதழ்

Published on August 28, 2012-10:20 am   ·   No Comments

முல்லைத்தீவு, கிளிநொச்சியைத் தொடர்ந்து இப்பொழுது வவுனியாவிலும் யுத்தத்தின் பின்னர் சரணடைந்தும் இன்னபிற வழிகளில் பிடிபட்ட பின்னரும் காணாமல் போகச்செய்யப்பட்டோருக்கான மரணச் சான்றிதழை வழங்குவதற்குவதான முயற்சிகளை பொலிசார் மேற்கொண்டு வருவதாகவும் அத்துடன் மேலும் சிலர் அண்மையில் காணாமல் போயுள்ளதாகவும் தகவல் கிடைத்திருப்பதாகவும் தமிழ்த் தேசியக் கூட்டமைப்பின் வன்னிப் பாராளுமன்ற உறுப்பினர் சிவசக்தி ஆனந்தன் தெரிவித்துள்ளார்.

ஆகவே இதனைத் தடுத்து நிறுத்துவதற்குச் சர்வதேச சமூகமும், மனித உரிமைகள் அமைப்புக்களும், மனித உரிமை ஆர்வலர்களும் முன்வரவேண்டும் என்று அவர் ஊடகங்களின் மூலம் வேண்டுகோள் விடுத்துள்ளார். இதுகுறித்து அவர் மேலும் தெரிவித்துள்ளதாவது:

யுத்தம் நடைபெற்ற காலகட்டத்திலும், யுத்தத்தின் பின்னரும் இராணுவத்திடம் சரணடைந்ததன் பின்னர் காணாமல் செய்யப்பட்டோருக்கும், இடைத்தங்கல் முகாம்களிலிருந்தும் பிற இடங்களிலிருந்தும் கைது செய்யப்பட்டு பின்னர் காணாமல் போகச் செய்யப்பட்டோருக்கும் வவுனியாவிலும் மரணச் சான்றிதழ் வழங்குவதற்கு நடவக்கை எடுக்கப்பட்டு காவல்துறையினர் மூலம் காணாமல் போனவர்களின் வீடுகளுக்கு மரணச்சான்றிதழுக்கான விண்ணப்பங்களும் வினியோகிக்கப்பட்டு வருகின்றன.

ஏற்கனவே தமது பிள்ளைகளும், கணவரும், நெருங்கிய உறவினரும், வேண்டப்பட்டவர்களும் உயிருடன் இருக்கின்றனரா என்பது தெரியாமல் ஏதோவொரு நம்பிக்கையில் வாழ்க்கையைக் கடத்திக்கொண்டிருக்கும் எமது மக்கள் அரசின் இந்நடவடிக்கையால் பெரிதும் அதிர்ச்சியடைந்திருக்கின்றனர்.

தமது கண்களின் முன்னால் அழைத்துச் செல்லப்பட்டவர்கள் எவ்வாறு காணாமல் போயினர் என்று அவர்கள் அதிர்ச்சியும் வேதனையும் கவலையும் அடைந்துள்ளனர். அத்துடன் காவல்துறையினர் கொடுத்த விண்ணப்பப் படிவங்களையும் வாங்க மறுத்துள்ளனர். எமக்கு எமது பிள்ளைகள் வேண்டும், எமக்கு எனது கணவர் வேண்டும், எமக்கு எமது உறவுகள் வேண்டும். அவர்கள் குற்றமிழைத்திருந்தால் சட்டத்தின்முன் நிறுத்தி தண்டனை வழங்குங்கள் அதைவிடுத்து மரணச்சான்றிதழ் வழங்குவது எந்தவகையில் நியாயம் என்று அவர்கள் கேட்கின்றனர்.

சில உதாரணங்களை முன்வைப்பது பொருத்தமாக இருக்கும் என்று நினைக்கின்றேன்.
வவுனியா, கல்மடு முதலாம் வட்டாரத்தைச் சேர்ந்த சுப்பிரமணியம் உதயகுமார் என்னும் 40வயது இளைஞர் (தற்போதைய வயது) கடந்த 08.01.2007 அன்று கல்மடுவிற்கும் ஈச்சன்குளத்திற்கும் இடையில் இராணுவத்தினரால் கைது செய்யப்பட்டுள்ளார். கைது செய்ததன் பின்னர் அவரை மண்டியிடச் செய்திருந்த நிலையில் அவரது சகோதரி அவரைப் பார்த்துள்ளார். இவரது தாயாரிடம் புலனாய்வுத்துறையினர் பலமுறை விசாரணைகளையும் மேற்கொண்டுள்ளனர்.

இதனைப் போன்றே வவுனியா சாளம்பனைச் சேர்ந்த நடராசா பேரின்பராசா என்னும் 38 வயதுடைய (தற்போதைய வயது) இளைஞரும் இராணுவத்தினரால் கைது செய்யப்பட்டுள்ளனர். இப்பொழுது இவர்களுக்கு மரணச் சான்றிதழ் வழங்குவதற்கு முயற்சிக்கப்படுகின்றது.

மேற்கண்ட சம்பவங்கள் சர்வதேச சமூகம் தமிழ் மக்கள் எதிர்நோக்கும் ஆபத்துக்களைப் புரிந்துகொள்வதற்குப் போதுமானதாக இருக்கும் என்று நம்புகின்றேன். ஆகவே சர்வதேச சமூகத்தினரும் மனித உரிமைகள் அமைப்புக்களும், மனித உரிமை ஆர்வலர்களும் நல்லுள்ளம் கொண்டோர்களும் இந்த விடயத்தில் உடனடியாகத் தலையிட்டு, காணாமல் போகச் செய்யப்பட்டோரின் விடயம் தொடர்பான உண்மைநிலையைக் கண்டறிந்து, தமிழ் மக்களுக்கு உரிய நியாயம் கிடைப்பதற்கு முயற்சிக்க வேண்டும் என்று கேட்டுக்கொள்கின்றேன்.

இது ஒருபுறமிருக்க, மிக அண்மையில் வவுனியாவில் சில யுவதிகள் காணாமல் போகச் செய்யப்பட்டுள்ளனர். தமது பிள்ளைகளின் எதிர்கால நலன்கருதி அவர்கள் பற்றிய விபரங்களை வெளியிடுவதற்குப் பெற்றோர் தயங்குகின்றனர். காணாமல் போகச் செய்யப்பட்ட தமது பிள்ளைகள் குறித்து வெளியிலும் சொல்ல முடியாமல், மனத்திற்குள்ளும் தேக்கிவைக்க முடியாமல், மிகுந்த துன்பத்துடன் மனவேதனையை அனுபவித்துவரும் குடும்பத்தினரின் பரிதாபநிலையையும் அதனால் அவர்கள் மனோநோயாளிகளாக உருவாவதற்கான சூழலையும் கருத்திற்கொண்டு இந்த விடயத்திலும் அனைவரும் கவனம் செலுத்த வேண்டும் என்றும் கேட்டுக்கொள்கின்றேன்.

எமது இளைஞர்களும், யுவதிகளும் வெளிநாடுகளுக்குக் குறிபப்hக அவுஸ்திரேலியாவிற்குச் செல்வதற்கு இதுவும் ஒரு காரணம் என்பதை இலங்கை அரசும் சர்வதேச சமூகமும் உணர்ந்துகொள்ள வேண்டும். தற்பொழுது ஆயிரத்திற்கும் மேற்பட்ட தமிழ் மக்கள் இலங்கை அரசினால் கைதுசெய்யப்பட்டுள்ளதுடன் ஏராளமானோர் ஆபத்தான கடற்பயணத்தில் உயிரழந்துமுள்ளனர். எனவே, எஞ்சியுள்ள அரசியல் கைதிகளையும், புனர்வாழ்வு முகாம் உள்ளிட்ட ஏனைய தடுப்பு முகாம்களில் உள்ள அனைத்து தமிழ்ப் பிரஜைகளையும் நிபந்தனையின்றி விடுவிப்பதற்குச் சர்வதேச சமூகமும், மனித உரிமை அமைப்புக்களும், மனித உரிமை ஆர்வலர்களும் சமுதாயத்தின்மீது அக்கறை கொண்ட அனைவரும் அனைத்து நடவடிக்கைகளையும் மேற்கொள்ள வேண்டும் என்று கேட்டுக்கொள்கின்றேன் என்று தெரிவித்துள்ளார்.

Readers Comments (0)

Comments are closed.

செய்திகள்

thayaparan

முள்ளிவாய்க்கால் நினைவேந்தலில் குழப்பங்களை தூண்டிவிட்ட அரசியல்வாதிகள். – இரா.துரைரத்தினம். [May 28, 2017]

முள்ளிவாய்க்கால் அழிவுக்கு பின்னரும் தமிழ் மக்கள் ஒற்றுமைப்படவில்லை என்பதற்கு கடந்த ...
Jaffna Journalists. 2

ஊடகத்துறையில் தடைகளை விலக்கல் என்ற தொனிப்பொருளில் யாழ். ஊடகவியலாளர்களுக்கு கருத்தரங்கு [May 28, 2017]

யாழ். ஊடக அமையத்தின் ஏற்பாட்டில் "தமிழ் கார்டியன்" ஊடக நிறுவனம் ...
IMG_9918

கலைநிகழ்வுகளால் களைகட்டிய சுவிஸ் வடமராட்சி கிழக்கு ஒன்றிய கலைமாலை 2017 [May 28, 2017]

சுவிஸ் வடமராட்சி கிழக்கு ஒன்றியத்தின் 10ஆவது ஆண்டு நிறைவை முன்னிட்டு ...
blood

மலையகத்தில் சீரற்ற காலநிலை- மகாவலி ஆறு பெருக்கெடுப்பு. [May 27, 2017]

மலையகப் பகுதியில் ஏற்பட்டு வரும் காலநிலை மாற்றத்தினால் நாளாந்தம் பல ...
3

சுவிஸ் செம்மாக்கிறேத்தன் அருள்மிகு ஸ்ரீகதிர்வேலாயுத சுவாமி ஆலய மகோற்சவ பெருவிழா [May 26, 2017]

சுவிஸ் செம்மாக்கிறேத்தன் அருள்மிகு ஸ்ரீகதிர்வேலாயுத சுவாமி ஆலய மகோற்சவ பெருவிழா ...
Arular

இனப்படுகொலைக்காக அரசாங்கத்தை தண்டிப்பதற்கு தமிழ் தலைவர்களுக்கு விருப்பம் இல்லை- ஈரோஸ் அருளர் குற்றச்சாட்டு VIDEO [May 26, 2017]

தமிழீழம் தமிழ் மக்களுக்கு சொந்தமானது. சிங்கள தேசம் சிங்கள மக்களுக்கு ...
IMG_5473

ஆழிக்குமரன் ஆனந்தன் நினைவாக வல்வெட்டித்துறையில் நீச்சல் தடாகம்- அடிக்கல் நாட்டப்பட்டது. VIDEO [May 26, 2017]

பாக்கு நீரிணையை நீந்தி கடந்த வல்வை ஆழிக்குமரன் ஆனந்தன் நினைவாக ...
North province

வடமாகாண பட்டதாரிகளின் செயலுக்கு வடமாகாணசபை கண்டனம். [May 25, 2017]

வடமாகாண சபையின் வாயில் கதவு களை மூடி மாகாணசபை உறுப்பினர்களை ...
North province

வடமாகாண அமைச்சர்களின் முறைகேடு பற்றிய விசாரணை அறிக்கை முலமைச்சரின் கையில். [May 25, 2017]

வடமாகாண அமைச்சர்கள் மீது முன் வைக்கப்பட்ட முறைகேட்டு குற்றச்சாட்டுக்கள் குறித்து ...
kansa

வல்வெட்டித்துறை கடற்பரப்பில் 51கிலோ கஞ்சா பொதிகள் கைப்பற்றப்பட்டன. [May 25, 2017]

வல்வெட்டித்துறை கடற்பரப்பில் இருந்து 51 கிலோ 700 கிராம் நிறையுடைய ...