Wednesday, January 17th, 2018

சம்பந்தனின் சர்வாதிகாரப்போக்கிற்கு மேலும் வழிவகுத்த 2010ஆம் ஆண்டு தேர்தல் முடிவுகள். த. தே கூ. தோற்றம் அங்கம் – 31

Published on July 13, 2017-8:47 pm   ·   No Comments

sampanthan and mavaiவடக்கு கிழக்கில் தமிழ் வாக்குகள் சிதறிக்கப்படக் கூடாது என்பதற்காகவும், கிழக்கு மாகாணத்தில் முக்கியமாக திருகோணமலை மாவட்டத்தில் தமிழ் பிரதிநிதித்துவம் காப்பாற்றப்பட வேண்டும் என்பதற்காகவும் பெரும் பிரயத்தனங்களின் மத்தியில் நான்கு கட்சிகளை இணைத்து உருவாக்கப்பட்ட தமிழ் தேசியக் கூட்டமைப்பில் முதலாவது பிளவு 2004ல் ஆனந்தசங்கரியால் ஏற்படுத்தப்பட்டது.

தமிழ் தேசியக் கூட்டமைப்புக்கு தலைமை தாங்கிய தமிழர் விடுதலைக் கூட்டணி என்ற கட்சியையும் அதன் உதயசூரியன் சின்னத்தையும் ஆனந்தசங்கரி அபகரித்து சென்றதால் அந்த பிளவு ஏற்பட்டது. தமிழர் விடுதலைக் கூட்டணி என்ற கட்சியும் தமிழ் மக்களின் அபிமானத்திற்குரிய சின்னமாக விளங்கிய உதயசூரியன் சின்னமும் தமிழ் மக்களின் கைகளை விட்டு சென்ற போதிலும் தமிழ் மக்கள் தமிழ் தேசியக் கூட்டமைப்பில் நம்பிக்கை வைத்திருந்தனர்.

2010ஆம் ஆண்டு புலம்பெயர் தமிழர்களின் தூண்டுதலில் கஜேந்திரகுமார் பொன்னம்பலம் தலைமையிலான அகில இலங்கை தமிழ் காங்கிரஷ் பிரிந்து சென்று யாழ்ப்பாணத்திலும் குறிப்பாக திருகோணமலையிலும் தனித்து போட்டியிட்டது தமிழ் மக்களின் ஒற்றுமையை சிதைக்கும் நடவடிக்கை என பலரும் கூறிய போதிலும் அதனை கஜேந்திரகுமார் போன்றவர்கள் ஏற்றுக்கொள்ளவில்லை.
இதேபோன்றதொரு சம்பவம் 1977ஆம் ஆண்டிலும் நடைபெற்றது.

இரு துருவங்களாக இருந்த தமிழரசுக்கட்சியும் அகில இலங்கை தமிழ் காங்கிரஷ் கட்சியும் இணைந்து தமிழர் ஐக்கிய விடுதலைக் கூட்டணி என்ற கட்சியை உருவாக்கி 1977ல் போட்டியிட்டன. இலங்கை தமிழர் வரலாற்றில் அத்தேர்தல் முக்கியத்துவம் வாய்ந்ததாகும். தமிழீழக் கோரிக்கையை முன்வைத்து தமிழர் விடுதலைக் கூட்டணி போட்டியிட்டது. அதனை சர்வஜனவாக்கெடுப்பாகவும் தமிழர் விடுதலைக் கூட்டணி அறிவித்திருந்தது.   ( ஆனால் தமிழீழத்தை தாம் ஒருபோதும் கோரவில்லை என சம்பந்தன் அண்மைக்காலத்தில் கூறிவருகிறார் )

சகல பேதங்களையும் மறந்து தமிழர்கள் தமது ஒற்றுமையின் பலத்தை காட்ட வேண்டும் என கங்கணம் கட்டியிருந்தனர்.

ஜி.ஜி.பொன்னம்பலத்தின் மறைவிற்கு பின்னர் அரசியலுக்கு வந்த குமார் பொன்னம்பலம் தனக்கு யாழ்ப்பாண தொகுதியில் போட்டியிட இடம்தர வேண்டும் என கோரியிருந்தார்.

தமிழர் விடுதலைக் கூட்டணியில் அங்கம் வகித்த தமிழரசுக்கட்சியும் அகில இலங்கை தமிழ் காங்கிரஷ் கட்சியும் 1970ஆம் ஆண்டு தேர்தலில் எந்தெந்த தொகுதியில் வெற்றி பெற்றனவோ அத்தொகுதிகளில் அக்கட்சியை சேர்ந்தவர்களுக்கு இடமளிப்பதென தமிழர் விடுதலைக்கூட்டணியின் தேர்தல் நடவடிக்கை குழு தீர்மானத்திருந்தது.

1970ஆம் ஆண்டு நல்லூர், கிளிநொச்சி, வட்டுக்கோட்டை தொகுதிகளில் அகில இலங்கை தமிழ் காங்கிரஷ் வெற்றி பெற்றிருந்தது. அத்தொகுதிகளில் அகில இலங்கை தமிழ் காங்கிரஷ் கட்சியை சேர்ந்தவர்களுக்கு வழங்குவதென முடிவு செய்யப்பட்டது. வட்டுக்கோட்டை தொகுதியில் போட்டியி;ட சந்தர்ப்பம் வழங்குவதாக தமிழர் விடுதலைக் கூட்டணியின் தேர்தல் குழு அறிவித்த போதிலும் அதனை ஏற்க மறுத்த குமார் பொன்னம்பலம் யாழ்ப்பாணத் தொகுதியே வேண்டும் என அடம்பிடித்தார்.

இதனையடுத்து தமிழர் விடுதலைக் கூட்டணியிலிருந்து வெளியேறிய குமார் பொன்னம்பலம் யாழ்ப்பாணத் தொகுதியில் சுயேட்சையாக போட்டியிட்டார். தமிழ் மக்கள் தங்கள் ஒற்றுமையின் பலத்தை உலகிற்கு காட்ட வேண்டும் என்றும் சிங்கள தேசத்துடன் இணைந்து வாழமுடியாது தாம் பிரிந்து செல்ல வேண்டும் என்ற அபிலாசையை வெளிப்படுத்தவதற்கான களமாக பார்க்கப்பட்ட 1977 பொதுத்தேர்தலில் குமார் பொன்னம்பலம் தமிழர் விடுதலைக் கூட்டணியிலிருந்து பிரிந்து சென்று சுயேட்சையாக போட்டியிட்டதை தமிழ் மக்கள் கவலையுடனும் வெறுப்புடனுமே பார்த்தனர். Kumarகுமார் பொன்னம்பலத்தின் முடிவை தமிழ் மக்கள் ஏற்றுக்கொள்ளவில்லை என்பதை அத்தேர்தல் முடிவுகள் எடுத்துக்காட்டின. தமிழீழ கோரிக்கையை முன்வைத்து போட்டியிட்ட தமிழர் விடுதலைக் கூட்டணிக்கு எதிராக கடுமையான பிரசாரத்தில் அன்று குமார் பொன்னம்பலம் ஈடுபட்டிருந்தார்.

அதன் பின்னர் குமார் பொன்னம்பலம் இறக்கும் வரை தமிழர் விடுதலைக் கூட்டணிக்கு எதிரான பிரசாரங்களிலேயே அவர் ஈடுபட்டிருந்தார். 1977ஆம் ஆண்டு தேர்தல் முடிந்த பின்னர் அகில இலங்கை தமிழ் காங்கிரஷ் கட்சியை தன்வசம் எடுத்துக்கொண்ட குமார் பொன்னம்பலம் அதன் பின்னர் 1982ஆம் ஆண்டில் நடைபெற்ற ஜனாதிபதி தேர்தல், 1989ஆம் ஆண்டு நடந்த பொதுத்தேர்தல் ஆகியவற்றில் அகில இலங்கை தமிழ் காங்கிரஷ் கட்சியிலேயே போட்டியிட்டார்.

தமிழ் அரசியல் கட்சிகள் பிரிந்து நிற்க கூடாது ஒற்றுமையாக ஒரே குடையின் கீழ் இருக்க வேண்டும் என்ற நோக்கில் உருவாக்கப்பட்ட தமிழர் விடுதலைக் கூட்டணியிலிருந்து அகில இலங்கை தமிழ் காங்கிரஷ் கட்சியை குமார் பொன்னம்பலம் பிரித்து எடுத்திருந்தார்.

அதே போன்றுதான் தமிழ் மக்களுக்கு பலமான அரசியல் தலைமை ஒன்றின் அவசியம் கருதி உருவாக்கப்பட்ட தமிழ் தேசியக் கூட்டமைப்பிலிருந்து அகில இலங்கை தமிழ் காங்கிரஷ் கட்சியை கஜேந்திரகுமார் பிரித்தெடுத்து 2010ஆம் ஆண்டு தேர்தலில் போட்டியிட்டார்.

யாழ். மாவட்டத்தில் எத்தனை தமிழ் கட்சிகள் போட்டியிட்டாலும் தமிழர் பிரதிநிதித்துவத்தை பாதிக்காது.

ஆனால் வன்னி திருகோணமலை மட்டக்களப்பு அம்பாறை மாவட்டங்களில் தமிழ் கட்சிகள் பிரிந்து நின்று போட்டியிட்டால் அது ஏனைய இனங்களுக்கே சாதகமாக அமையும். முக்கியமாக திருகோணமலை மாவட்டத்தில் தமிழர் பிரதிநிதித்துவத்தை காப்பாற்ற வேண்டுமாக இருந்தால் தமிழ் கட்சிகள் அனைத்தும் ஒன்றிணைந்து ஒரே சின்னத்தின் கீழ் போட்டியிட்டால் மட்டுமே தமது பிரதிநிதித்தவத்தை காப்பாற்றி கொள்pள முடியும்.

2000ஆம் ஆண்டு நடைபெற்ற தேர்தல் இதற்கு சிறந்த உதாரணமாகும். வடக்கு கிழக்கில் தமிழர் தாயகத்தின் தலைநகர் திருகோணமலை என சொல்லிக்கொள்கிறோம். ஆனால் 2000ஆம் ஆண்டு பொதுத்தேர்தலில் திருகோணமலை மாவட்டத்திலிருந்து ஒரு தமிழ் பிரதிநிதியை கூட பெற முடியாமல் போனது. 2000ஆம் ஆண்டு பொதுத்தேர்தலில் திருகோணமலை மாவட்டத்தில் முஸ்லீம்களும் சிங்களவர்களும் மட்டுமே தெரிவு செய்யப்பட்டனர். இதற்கு காரணம் தமிழ் கட்சிகள் பிரிந்து நின்று போட்டியிட்டமையாகும்.

தமிழ் கட்சிகள் பிரிந்து நின்றால் திருகோணமலையில் தமிழ் பிரதிநிதித்துவம் இழக்கும் அபாயம் காணப்பட்ட போதிலும் சம்பந்தனை தோற்கடிக்க வேண்டும் என்ற காரணத்தை கூறி அகில இலங்கை தமிழ் காங்கிரஷ் திருகோணமலையில் போட்டியிட்டது. இது கிழக்கு மாகாண மக்களுக்கு அகில இலங்கை தமிழ் காங்கிரஷ் கட்சி மீது வெறுப்பை ஏற்படுத்தியது என சொல்லலாம்.

கிழக்கு மாகாண மக்கள் மட்டுமல்ல யாழ்ப்பாண மக்களும் தமிழ் தேசியக் கூட்டமைப்பிலிருந்து தமிழ் காங்கிரஷ் வெளியேறியதை விரும்பவில்லை என்பதையே 2010ஆம் ஆண்டு தேர்தல் முடிவுகள் வெளிப்படுத்தின.

யாழ். மாவட்டத்தில் அகில இலங்கை தமிழ் காங்கிரஷ் கட்சிக்கு ஆகக்குறைந்தது ஒரு ஆசனம் கிடைக்கும் என கருத்துக்கணிப்பாளர்கள் நம்பினர். புலம்பெயர் தமிழர்கள் அகில இலங்கை தமிழ் காங்கிரஷ் கட்சிதான் அதிகூடிய வாக்குகளை பெற்று 5ஆசனங்களுக்கு மேல் பெறும் என நம்பினர்.

ஆனால் மக்கள் தீர்ப்பு எதிர்மாறாக அமைந்திருந்தது. யாழ். மாவட்டத்தில் பொருளியல் பாடத்தில் பிரபல ஆசிரியராக இருந்த வரதராஜன் அவர்களை தலைமை வேட்பாளராக கொண்ட அகில இலங்கை தமிழ் காங்கிரஷ் 6362 வாக்குகளை மட்டுமே பெற்றிருந்தது. வரதராஜன் ஆசிரியரின் தனிப்பட்ட செல்வாக்கு காரணமாக குறைந்தது 2ஆயிரம் வாக்குகள் கிடைத்திருக்கும், மிகுதி 4ஆயிரம் வாக்குகளையே கஜேந்திரகுமார் பொன்னம்பலம், செல்வராசா கஜேந்திரன், பத்மினி சிதம்பரநாதன், கெனடி விஜயரத்தினம் உட்பட ஏனைய வேட்பாளர்கள் அனைவரும் சேர்ந்து பெற்றிருந்தனர்.

2004ஆம் ஆண்டு பொதுத்தேர்தலில் தமிழ் தேசியக் கூட்டமைப்பில் போட்டியிட்ட செல்வராசா கஜேந்திரன் ஒரு இலட்சத்து 12ஆயிரத்து 77 விருப்பு வாக்குகளை பெற்றிருந்தார். பத்மினி சிதம்பரநாதன் 68 239 வாக்குகளையும், கஜேந்திரகுமார் பொன்னம்பலம் 60768 வாக்குகளையும் பெற்றிருந்தனர். இவ்வளவு பெருந்தொகையான விருப்பு வாக்குகளை பெற்றவர்களால் 6 ஆண்டுகள் கழித்து நடந்த தேர்தலில் 6ஆயிரம் வாக்குகளை மட்டுமே பெற முடிந்தது. விடுதலைப்புலிகள் இல்லாத சூழலில் நடைபெற்ற தேர்தல் என்பதாலா, அல்லது தமிழ் தேசியக் கூட்டமைப்பிலிருந்து பிரிந்து சென்றதை தமிழ் மக்கள் ஏற்றுக்கொள்ளவில்லையா என்ற கேள்வி எழுகிறது.

புலம்பெயர் தமிழர்களின் பெரும் ஆதரவும் நிதி உதவியும் இருந்த போதிலும் அகில இலங்கை தமிழ் காங்கிரஷ் கட்சியால் ஒரு ஆசனத்தை கூட பெற முடியாமல் போய்விட்டது.

2010ஆம் ஆண்டு தேர்தலில் தமிழ் தேசியக் கூட்டமைப்பு 65119 வாக்குகளை பெற்று 5 ஆசனங்களையும், ஈ.பி.டி.பி மற்றும் ஐக்கிய மக்கள் சுதந்திர முன்னணி இணைந்து போட்டியிட்டு 47622 வாக்குகளை பெற்று 3 ஆசனங்களையும் ஐக்கிய தேசியக்கட்சி 12624 வாக்குகளை பெற்று ஒரு ஆசனத்தையும் பெற்றுக்கொண்டன.

திருகோணமலை மாவட்டத்தில் ஐக்கிய மக்கள் சுதந்திர கூட்டமைப்பு 59784 வாக்குகளை பெற்று 2 ஆசனங்களையும் ஐக்கிய தேசியக்கட்சி 39691 வாக்குகளை பெற்று ஒரு ஆசனத்தையும், தமிழ் தேசியக் கூட்டமைப்பு 33268 வாக்குகளை பெற்று ஒரு ஆசனத்தையும் பெற்றுக்கொண்டன. தமிழ் தேசியக் கூட்டமைப்பிலிருந்து பிரிந்து தனியாக போட்டியிட்ட அகில இலங்கை தமிழ் காங்கிரஷ் கட்சியால் 1182 வாக்குகளை மட்டுமே பெற முடிந்தது.

2010ஆம் ஆண்டு தேர்தல் முடிவுகள் தமிழ் தேசியக் கூட்டமைப்பின் தலைவர்களான சம்பந்தன், போன்றவர்கள் சர்வாதிகாரப்போக்கிலும் தன்னிச்சையாகவும் நடந்து கொள்வதற்கு வழி ஏற்படுத்தியது. தாம் எவ்வாறு செயல்பட்டாலும் தமிழ் மக்கள் தமிழ் தேசியக் கூட்டமைப்பையே தெரிவு செய்வார்கள். அவர்களுக்கு வேறு தெரிவு கிடையாது. எனவே தமிழ் மக்களின் பிரதிநிதிகள் தாமே என்ற அகங்காரமும் அவர்களுக்கு ஏற்பட்டது.

2001ஆம் ஆண்டு பொதுத்தேர்தலில் முதல்தடவையாக நான்கு கட்சிகளும் இணைந்து தமிழ் தேசியக் கூட்டமைப்பு என்ற பெயரில் உதயசூரியன் சின்னத்தில் போட்டியிட்டு வெற்றி பெற்ற பின்னர் 2002ஆம் ஆண்டு இலங்கை அரசாங்கத்திற்கும் தமிழீழ விடுதலைப்புலிகளுக்கும் இடையில் சமாதான உடன்படிக்கை ஏற்படுத்தப்பட்டது. இதன் பின்னர் 2002ஆம் ஆண்டு ஏப்ரலில் தமிழீழ விடுதலைப்புலிகளின் தலைவர் வேலுப்பிள்ளை பிரபாகரன் அவர்களை கிளிநொச்சியில் தமிழ் தேசியக் கூட்டமைப்பு நாடாளுமன்ற உறுப்பினர்கள் சந்தித்தனர். அதன் பின்னர் தமிழ் தேசியக் கூட்டமைப்பின் நடவடிக்கைகள் அனைத்தும் விடுதலைப்புலிகளின் பணிப்பிற்கமையவே நடைபெற்றது. சம்பந்தனோ மாவை சேனாதிராசாவோ முடிவு எடுக்கும் அதிகாரம் கொண்டவர்களாக இருக்கவில்லை. அதிகாரம் அனைத்தும் கிளிநொச்சியிலேயே இருந்தது.

நாங்கள் சொல்வதை செய்ய வேண்டியதுதான் அவர்களின் கடமை என ஒரு தடவை விடுதலைப்புலிகளின் அரசியல் ஆலோசகர் அன்ரன் பாலசிங்கம் அவர்கள் கூறியிருந்தார்.

2009ஆம் ஆண்டு இறுதி யுத்தம் முடியும் வரை தமிழ் தேசியக் கூட்டமைப்பின் நாணயக்கயிறு கிளிநொச்சியிலேயே இருந்தது. ஆனால் 2009ஆம் ஆண்டு இறுதி யுத்தம் முடிந்து விடுதலைப்புலிகள் இனி இல்லை என்றவுடன் தமிழ் தேசியக் கூட்டமைப்பின் தலைவர்களான சம்பந்தன் போன்றவர்கள் தங்கள் சுயரூபத்தை காட்ட முற்பட்டனர்.

இதன் வெளிப்பாடாகவே 2010ஆம் ஆண்டு பொதுத்தேர்தலில் தமிழ் தேசியக் கூட்டமைப்பின் வேட்பாளர் பட்டியலில் 2004ல் விடுதலைப்புலிகளின் சிபார்சில் போட்டியிட்டவர்களுக்கு இடமில்லை என சம்பந்தன் அறிவித்தார்.

இந்த அறிவிப்பும் புலம்பெயர் நாடுகளில் உள்ள விடுதலைப்புலிகள் சார்பு அமைப்புக்களுக்கு சம்பந்தன் மீது கோபமும் வெறுப்பும் ஏற்பட காரணம் எனலாம்.

இறுதி யுத்தம் முடிந்த பின்னர் தான் நினைத்தவாறு செயற்பட ஆரம்பித்த சம்பந்தன் போன்றவர்களுக்கு 2010ஆம் ஆண்டு தேர்தல் முடிவுகள் மேலும் உற்சாகத்தை கொடுத்தது. வாக்களித்த மக்களை மறந்து சர்வாதிகாரப்போக்கில் முடிவுகளை எடுக்க ஆரம்பித்தனர்.
( தொடரும் ) ( இரா.துரைரத்தினம் )sampanthan and mavai

Readers Comments (0)

Comments are closed.

செய்திகள்

kennady

நண்பன் கெனடியின் மரணம்- அதிர்ச்சியிலிருந்து மீளமுடியவில்லை. – இரா.துரைரத்தினம். [January 11, 2018]

எனது மிகநெருங்கிய நண்பனும் கிழக்கு பல்கலைக்கழக முன்னாள் விரிவுரையாளரும், எத்தோப்பிய ...
vavuniya

மகாறம்பைக்குளத்தில் பெண் ஒருவர் கொலை- பெண்ணின் காதலனும் சடலமாக மீட்பு [January 9, 2018]

வவுனியா மகாறம்பைக்குளம் பொலிஸ் காவலரனுக்கு பின்புறம் அமைந்துள்ள வீடொன்றிலிருந்து இன்று ...
srinesan 3

ஊடகவியலாளர்கள் கல்விமான்களை வேட்டையாடியவர்கள் வாக்கு கேட்கின்றனர். [January 8, 2018]

புத்திஜீவிகள் ஊடகவியலாளர்கள் கல்விமான்களை படுகொலை செய்தவர்கள் இன்று வாக்கு கேட்கின்றனர். ...
ananda

ஆனந்தசங்கரி- சுரேஷ் கூட்டணியின் தேர்தல் விஞ்ஞாபனம்- வேசம் கலைந்தது. [January 5, 2018]

ஆனந்தசங்கரி மற்றும் ஈ.பி தலைவர் சுரேஷ் பிரேமச்சந்திரன் ஆகியோரின் கூட்டணியான ...
raveendran

பொதுமக்களை பொலிஸார் அச்சுறுத்தினால் உடன் அறிவியுங்கள்- பொலிஸ் ஆணைக்குழு அறிவிப்பு [January 5, 2018]

பொதுமக்களை தாக்குதல், அடித்தல் துன்புறுத்தல் மற்றும் அதிகாரத்தை முறைகேடாகப் பயன்படுத்துதல் ...
uthayakuma

யாழ் மற்றும் மட்டக்களப்பு மாநகரசபைகளுக்கான சூரியன், சைக்கிள் கட்சிகளுக்கு நடந்த அவலம். [December 21, 2017]

யாழ்ப்பாண மாநகரசபைக்கென தமிழர் விடுதலைக் கூட்டணி சமர்ப்பித்த வேட்புமனு உரிய ...
sritharan

கிளிநொச்சி மாவட்டத்தில் பங்களாகிக்கட்சிகளை ஒதுக்கவில்லை – சிறிதரன் விளக்கம். [December 21, 2017]

கிளிநொச்சி மாவட்டத்தில் 3 பிரதேச சபைகளுக்குமான தேர்தல் வேட்பாளர் பட்டியலில் ...
ananthy 1

அனந்தி வந்தபோது எழுந்து நிற்காமல் மேலும் கீழும் பார்த்த வயதான காவலாளியின் வேலை பறிபோனது! [December 17, 2017]

வடமாகாண அமைச்சர் அனந்தி சசிதரனிற்கு எழுந்து மரியாதை செய்யாத வயதான காவலாளி ...
DSC02631

முனைப்பினால் 34 பேருக்கு வாழ்வாதார உதவிகள் [December 11, 2017]

முனைப்பு சிறிலங்கா நிறுவனத்தின் வறுமைக் கோட்டின் கீழ் வாழும் மக்களின் வாழக்கைதரத்தினை மேம்படுத்தும் வேலைத்திட்டத்தின் கீழ்  இவ்வாண்டு (2017) 34 பேருக்குவாழ்வாதாரத்துக்கான உதவிகள் வழங்கி வைக்கப்பட்டுள்ளதுடன் அத்திட்டங்கள் ஊடாகபயனாளிகள் நாளாந்த வருமானத்தைப்பெற்று வருவதாக முனைப்பின்சிறிலங்காநிறுவனத்தின் செயலாளர் இ.குகநாதன் தெரிவித்தார்.   மட்டக்களப்பிலுள்ள தெரிவு செய்யப்பட்ட  சில குடும்பங்களுக்கு  வாழ்வாதரஉபகரணங்கள்  வழங்கும் நிகழ்வு  (9.12.2017) சனிக்கிழமை மாலை மட்டக்களப்பு கச்சேரியில்வைத்து வழங்கி வைக்கப்பட்டது. முனைப்பின் சிறிலங்காநிறுவனத்தலைவர் மா.சசிகுமார் தலைமையில் நடைபெற்ற நிகழ்வில்  பிரதம அதிதியாக மாவட்ட அரசாங்க அதிபர் மாணிக்கம் உதயகுமார் கலந்து கொண்டுபயனாளிகளுக்கு உபகரணங்களை வழங்கி வைத்தார். சுவிட்சர்லாந்து முனைப்பு நிறுவனத்தின் நிதி அனுசரணையுடன் இந்த வாழ்வாதார உபகரணங்கள் வழங்கப்பட்டன. இந்த வைபவத்தில்;  மட்டக்களப்பு மாவட்ட செயலக கணக்காளர் நேசராசா மற்றும்மட்டக்களப்பு மாவட்ட உள்ளுராட்சி உதவி ஆணையாளர் கே.சித்திரவேல் மற்றும்சுவிட்சர்லாந்து முனைப்பு நிறுவனத்தின்  நிறைவேற்றுப்பணிப்பாளர்மாணிக்கப்போடி.குமாரசுவாமி உட்பட முனைப்பு சிறிலங்கா நிறுவனத்தின்  பொருளாளர்அரசரெத்தினம்  தயானந்தரவி , உப செயலாளர் எல் தேவஅதிரன்  உட்பட பலமுக்கியஸ்தர்கள் கலந்து கொண்டனர்.
UNO GENEVA

69வது வருடத்தை கொண்டாடும் சர்வதேச மனித உரிமை பிரகடனம் . [December 10, 2017]

மனித உரிமைகளின் வரவிலக்கணம், அடிப்படைகளை கிறேக்கர், உரோம காலத்தில் உருவானதாக ...